Unseri gleini "Dänggwäärzli" - Gschicht

Dänggwäärzli

Im 1992 isch's passiert,
mer het scho wider iber d'Fasnacht diskudiert.
Innere haimelige Baslerbaiz het mer sich entschlosse
und die ney Waageclique miteme Glas Wyy begosse.

"Dänggwäärzli – Waggis" e Kopf mit Humor,
so heisst die Clique s'isch wirgglig woor.
An dr Fasnacht 1993 isch's denn so wyt,
sii mache s'erschtmol als Waggis am Cortège mit.

Drey Daag lang ziehn sii duure,
denn syy Alli uff dr Schnuure
Sii mache e Stai und so hogge sii doo,
die Fasnacht isch nämlig viil z'dyyr uuse koo.

Kei Frangge in dr Kasse, kei Rappe im Sagg,
dr Obmaa isch gange vom Gugger jo phaggt!
Doo kunnt e Ängel vo Himmelried derhäär,
ibernää duet er Clique es fallt ihm zwar schwäär.

Doch was soll er au mache es liigt halt im Bluet,
als rächte Bebbi hesch vo dr Fasnacht nie gnueg!
Als neie Obmaa vo de "Dänggwäärzli" ruumt er grad uff,
verbyy isch die Zyt mit chaotischem Buff.

Au bi de Aktive duet mer ruume,
doo kunnt e männge nümm uusem stuune
Die ainte tschumple druus und anderi blyybe,
jetzt herscht äntlig wider Friide.

So goot dass Joor fir Joor mol uff mol ab,
doch "Dänggwäärzli – Waggis" die mache nid schlapp.
Im 2002 doo hän sii's Allne bewiise und dien's gniesse,
syt 10 Joor dien sii Orange, Mimose und Räppli verschiesse.

Au unser Fasnachts- Comité lipft dr Huet,
sii griesse frintlig dass duet guet!
"Dänggwäärzli" syy dass hän mir welle,
jetzt syy mer's und au fertig mit verzelle.

Lueget doch an dr Fasnacht mol byy uns verbyy,
denn dringge mer zämme e Gleesli "Dänggwäärzli- Wyy"
Sali zämme 
Eieri "Dänggwäärzli – Waggis"
   

Näggschte 10 Termine  

  • 16.12.2017
    Wagenbau?
  • 06.01.2018
    Wagenbau / Bowlingplausch
  • 13.01.2018
    Wagenbau
  • 20.01.2018
    Wagenbau
  • 26.01.2018
    Hock/ Schwyzerhüsli
  • 27.01.2018
    Wagenbau
  • 03.02.2018
    Unvorhergesehenes
  • 10.02.2018
    Unvorhergesehenes
  • 17.02.2018
    Wagenverschieben IWB
  • 19.02.2018 - 21.02.2018
    Basler Fasnacht 2018
   

Verherige 5 Termine  

   
© Dänggwäärzli
© 2017 Waageglygge Dänggwäärzli-Waggis 1992 - Basel